歐國盃:奧地利求開齋可挫北馬其頓

奧地利求開齋可挫北馬其頓今晚C組另一場賽事，奧地利喺羅馬尼亞中立場對北馬其頓。奧地利之前兩度進軍歐國盃決賽周都未嘗一勝，今仗屬「開齋」大好機會；北馬其頓憑歐國聯D組附加賽入圍，明顯志在參與，而且兩隊於兩年前歐國外同組，奧地利成功「雙殺」對手，一於捧奧地利主勝。（Now618及616周一凌晨零時直播）奧地利近年國際賽表現唔錯，歐國外G組以次名出線，今年世盃外3仗亦獲兩勝，表現對辦，主將阿拉巴喺拜仁慕尼黑贏盡所有錦標，今夏轉投皇家馬德里，國家隊以佢做核心，踢法不斷有進步，其拍擋沙比薩亦喺ＲＢ萊比錫有出色表現，值得期待。37歲彭迪夫作用有限北馬其頓喺C組被視為列強搶分對象，佢哋雖然今年世盃外曾爆大冷2比1擊敗德國，但無疑引起各隊注意，並加以防範。陣中最出名球星彭迪夫已經年屆37歲，作用有限，效力列斯聯嘅阿里奧斯基亦唔係咩頂級球星，今屆賽事要爆冷搶分難度甚高，奧地利只要發揮正常，3分手到拿來。