歐國盃：瑞典走下坡捧奧地利客勝_東方日報

歐國外F組焦點戰，瑞典主場火併奧地利。瑞典今非昔比，而且遇到實力稍強嘅球隊即腳軟，奧地利在主帥蘭歷克帶領下愈踢愈好，加上近年碰頭食住瑞典，不妨直取客勝。（周三凌晨2時45分開賽）

瑞典近年演出漸走下坡，上年無緣世盃決賽周，嚟到歐國外亦未見起色，頭4輪只得2勝2負，贏嗰兩場係對弱旅阿塞拜疆同愛沙尼亞，一遇到比利時同奧地利立即敗陣，兩仗都交白卷，令人失望。以往瑞典仲有神箭伊巴謙莫域撐住，依家陣中只係得阿歷山大伊沙克同古路施夫斯基較有級數，難怪只能欺善怕惡。

蘭歷克逼搶戰術有料到
另邊廂，奧地利自從上年邀得前曼聯看守領隊蘭歷克接手後，持續進步，其逼搶戰術非常適合球隊，上年歐國聯曾大炒克羅地亞同打和法國，嚟到歐國外頭4輪取得3勝1和，基哥列舒治更轟入3粒，佢喺日前熱身賽打和摩爾多瓦之役又有士哥，近5次為奧地利上陣入4球，不容忽視。翻查紀錄，雙方近3次正面交鋒，奧地利全部贏晒，包括上輪憑包姆加特拿梅開二度贏2比0，明顯格食格，今仗可再剋死瑞典。