歐國盃：地頭出擊做好戲 塞爾維亞入球騷有保證_東方日報

歐國盃外圍賽G組，塞爾維亞主場迎戰保加利亞，第2位塞爾維亞今仗和波拎1分，就可以取得出線資格，但畢竟喺自己地頭比賽，應該唔會求和咁衰仔，預料會主攻求勝。至於保加利亞篤定排包尾，冇心理包袱，應會踢得比較開放，中位數2.5球嘅入球大啱數。（周日晚10時開賽）

G組榜首匈牙利已穩奪出線權，餘下1個直接出線席位屬於塞爾維亞同黑山之爭，塞爾維亞領先黑山2分，加上對賽成績佔優，今場和波就可以出線。不過塞爾維亞傳統上並非擅守球隊，加上現時中前場多猛將，自然採取主攻踢法，鋒線上阿歷山大米祖域、杜辛華荷域都係獨當一面射手，要攻入保加利亞大門，並唔困難。塞爾維亞主攻嘅同時，防線難免比較弱，幾乎場場都有失波，令佢哋近4場歐國外總入球全開3球或以上，今場亦未必可以保持清白之身。

保加利亞包尾放軟手腳
至於保加利亞7場歐國外不勝，加上對賽成績唔及立陶宛，篤定排包尾，但仲有機會靠歐國聯成績，取得附加賽資格，不過就要視乎歐國外其他組別最終結果而定，現時只能「聽天由命」。保加利亞今場冇必要介懷勝負，可以享受快樂足球，最起碼要入波謝幕，有利開出大比數賽果。