Combo King：非洲兵走晒波爾多細守城池

今日阿King集中講法國波，法甲直播有場波爾多主場鬥尼斯，波爾多陣中有唔少主力離隊參戰非國盃，戰鬥力打折扣，上周作客摩納哥便成功以守代攻搶得1分，今周面對近五場作客有4場輸波兼開細嘅尼斯，預計會係一場入球偏少嘅比賽，1.65倍細盤可作過關重心。

（TVB 302周六凌晨3時30分直播）

非洲國家盃決賽周本周末於赤道畿內亞揭幕，大部分喺歐洲搵食嘅非洲球員都已離隊作最後備戰，其中法甲、法乙球會更係重災區，以今場主角波爾多為例，前鋒沙維特、中場卡斯里、安祖樸高、阿布度查奧爾及後防魯杜域辛尼分別要為所屬國家出戰，一下子冇咗多名主力，對教練沙洛調兵遣將點都有影響，上周末佢哋作客對摩納哥就係大部分時間處於被動，結果幸保不失悶和0比0，就算今次返回主場出戰，喺多名主力缺陣下，亦不宜對佢哋攻力有太大期望。

尼斯向來不擅作客，連盃賽在內近5場作客輸咗4場，而且4次輸波全部冇入波，不過佢哋總算知恥近乎勇，作客唔會胡亂搶攻，所以甚少出現大敗情況，佢哋對上呢4場輸波嘅失球數字全部一球起、兩球止，今次好大機會又係僅敗，一於捧細盤。

拉瓦勒硬淨和波唔怕追
另外兩關揀咗法乙賽事，拉瓦勒主場對迪安，拉瓦勒今季9場主場聯賽未輸過，但當中有6次和波，今次面對前列分子迪安係一場五五波，不妨再追和。最後杜亞斯主場鬥榜首特魯瓦，杜亞斯上周擊敗迪安打破對手今季主場不敗身，狀態當弗，今返主場對住特魯瓦未驚過，捧讓球主勝。